გაზეთ "ვაშინგტონ პოსტის" მონაცემებით, ამერიკელებმა ატომური ენერგიის საერთაშორისო სააგენტოს, სულ მცირე, სამი დამატებითი ობიექტის შესახებ მიაწოდეს ინფორმაცია. ამჟამად დამასკოსთან მიმდინარეობს მოლაპარაკებები აღნიშნული ობიექტების შემოწმების შესახებ. ამერიკეული გამოცემა, საკუთარ წყაროებზე დაყრდნობით, არ გამორიცხავს, რომ ეს სამი ობიექტი ალ-ქიბარის რეაქტორის დამხმარე სტრუქტურები იყოს.

აშშ-ს ხელმძღვანელობაში აღნიშნულის თაობაზე კომენტარს არ აკეთებენ. თუმცა, არც ვაშინგოტნი და არც დასავლეთის სხვა ქვეყნები არ ფარავენ თავიანთ ინტერესს იმ საკითხზე, თუ საიდან იღებდა ალ-ქიბარის რეაქტორი ბირთვულ საწვავს.

ცენტრალური სადაზვერვო სამმართველოს ვერსიით, ალ-ქიბარის რეაქტორზე, რომელიც ჩრდილოკორეელი სპეციალისტების დახმარებით აიგო, შესაძლოა, ატომური იარაღისთვის განკუთვნილი პლუტონიუმი ეწარმოებინათ. დაზვერვის შეფ მაიკლ ჰეიდენის აზრით, დამასკო, უბრალოდ, დროს წელავს იმ იმედით, რომ ატომური ენერგიის საერთაშორისო სააგენტოს ინსპექტორებს სტრატეგიული მნიშვნელობის ობიექტების შესახებ წინასწარ მომზადებულ მცდარ ინფორმაციას წარუდგენს.

უნდა აღინიშნოს, რომ ამ რამდენიმე ხნის წინ ატომური ენერგიის საერთაშორისო სააგენტომ სირიის ხელისუფლებასთან მიაღწია თანხმობას ისრაელის მიერ გასულ წელს განადგურებული ბირთვული რეაქტორის შემოწმებაზე. თუმცა, იმავდროულად, ოფიციალურმა დამასკომ სააგენტოს ინსპექტორებს სხვა ობიექტების შემოწმება აუკრძალა.

აქვე უნდა ითქვას ისიც, რომ უკანასკნელი ათი წლის მანძილზე შეერთებული შტატების დაზვერვამ ვერცერთხელ ვერ შეძლო, დაემტკიცებინა, რომ ამა თუ იმ ქვეყანაში მასობრივი განადგურების იარაღის არსებობის თაობაზე მის მიერ მოპოვებული ინფორმაცია უტყუარია. ექსპერტების აზრით, სირიელებს ალ-ქიბარში "სამხილების" მთლიანად მოსასპობად საკმარისზე მეტი დრო ჰქონდათ.