რუსეთის ბოლო ნაბიჯებს გუშინ ნატო გამოეხმაურა. "რიტორიკა ძალის
შესაძლებელი გამოყენების თვალსაზრისით დაძაბულობას აძლიერებს და
საქართველოს ტერიტორიულ მთლიანობას საფრთხეს უქმნის," - განაცხადა
ალიანსის ოფიციალურმა წარმომადგენელმა ჯეიმს აპატურაიმ.
კონფლიქტურ ზონაში რუსი მშვიდობისმყოფელების კონტინგენტის გაზრდაზე
რუსეთის განზრახვის შესახებ საუბრისას ნატო-ს ოფიციალურმა წარმომადგენელმა
განაცხადა, რომ "წმინდა ტექნიკურად" ეს გათვალისწინებულია,
მაგრამ "პოლიტიკური კუთხით ეს კი არ ამცირებს, არამედ აძლიერებს
დაძაბულობას." "მოკავშირეები საქართველოს ტერიტორიული მთლიანობის
მხარდაჭერაში ერთსულოვანნი არიან და მხარს არ დაუჭერენ ნებისმიერ ნაბიჯს,
რომელიც მას დე იურე და დე ფაქტო უქმნის საფრთხეს," - აღნიშნა აპატურაიმ.
მან განაცხადა, რომ ნატო "სიტუაციის განვითარებას შეშფოთებით ადევნებს
თვალს" და მხარეებს რიტორიკის დონის დაწევისკენ მოუწოდებს, ასევე
მოუწოდებს, არ გადადგან ნაბიჯები, რომლებიც ვითარების შემდგომ გამწვავებას
გამოიწვევს.
ნატო-ს ოფიციალური წარმომადგენლის თქმით, იგი ქართული ჯარების
კონფლიქტის რაიონებში განთავსების, ასევე რუს მშვიდობისმყოფელთა
კონტინგენტის გაზრდის თაობაზე ინფორმაციას არ ფლობს.
რუსეთის გადაწყვეტილებას რეაქცია ვაშინგტონშიც მოჰყვა. როგორც სააგენტო
"ფრანს-პრესთან” საუბარში აშშ-ს პრეზიდენტთან არსებული ეროვნული
უსაფრთხოების საბჭოს წარმომადგენელმა გორდონ ჯონდროემ განაცხადა: "ჩვენ
შეშფოთებულნი ვართ რეგიონიდან მოსული ცნობებით. შეერთებული შტატების
პრეზიდენტი საქმის კურსშია ამ საკითხის თაობაზე.”
ევროპის საბჭოს გენერალურმა მდივანმა ტერი დევისმა, თავის მხრივ,
რუსეთს და საქართველოს უთანხმოებების მშვიდობიანი გზით მოგვარებისკენ
მოუწოდა. "საქართველოს და რუსეთს შორის აფხაზეთთან მიმართებაში არსებული
დაძაბულობა იმ წერტილს აღწევს, როდესაც მისი კონტროლიდან გამოსვლის რისკი
ჩნდება. ორივე მხარემ მდგომარეობის შემდგომი გაუარესების თავიდან
ასაცილებლად ყველაფერი უნდა გააკეთოს, რაც მათზეა დამოკიდებული," -
განაცხადა დევისმა.
გენერალურმა მდივანმა საქართველოს პრეზიდენტ მიხეილ სააკაშვილის მიერ
29 აპრილს საღამოს გაკეთებულ მიმართვას აფხაზეთის და სამხრეთ ოსეთის
ხალხებისადმი, "იმედის მომცემი" უწოდა.
გუშინ საქართველოს საგარეო უწყებამ საერთაშორისო თანამეგობრობას და
საერთაშორისო ორგანიზაციებს მიმართა და რუსეთის შეიარაღებული აგრესიის
აღსაკვეთად ადეკვატური, გადამჭრელი და დროული ზომების მიღებისკენ მოუწოდა.
ოფიციალურმა თბილისმა რუსეთის მხრიდან გადადგმულ ნაბიჯს "სამშვიდობო ოპერაციად შენიღბული აგრესია" უწოდა.
როგორც განცხადებაშია აღნიშნული, 29 აპრილს მდინარე ფსოუზე საქართველოს
სახელმწიფო საზღვარი გადმოლახა რუსულმა ჯავშანტექნიკამ, მძიმე არტილერიამ
და დამატებითმა საჯარისო ქვედამაყოფებმა. ამასთანავე, რუსეთის თავდაცვის
სამინისტროს განცხადების თანახმად, აფხაზეთის ადმინისტრაციულ საზღვარზე,
საქართველოს ხელისუფლების თანხმობის გარეშე, თხუთმეტი ახალი საგუშაგო
გაიხსნა.
"აფხაზეთში სამხედრო ძალის ფართომასშტაბიანი ზრდა წარმოადგენს აგრესიის
კიდევ ერთ ფაქტს და რუსეთის ფედერაციის მორიგ სახიფათო ნაბიჯს, რომელიც
ზრდის კონფლიქტის ესკალაციის რისკს და საფრთხეს უქმნის მშვიდობასა და
უსაფრთხოებას რეგიონში," - აღნიშნულია საქართველოს საგარეო უწყების
განცხადებაში.
რუსეთისÕსაგარეო საქმეთა მინისტრმა სერგეი ლავროვმა მოსკოვის ბოლო
გადაწყვეტილებაზე განმარტებები 29 აპრილს საღამოს ლუქსემბურგში გააკეთა.
"ქართულ-აფხაზური კონფლიქტის ზონაში რუსი სამშვიდობოების რაოდენობა არ
გადაამეტებს საერთაშორისო შეთანხმების ნორმებს," - აღნიშნა ლავროვმა.
ევროკავშირის საგარეო საქმეთა მინისტრების შეხვედრის შემდეგ გამართულ
პრესკონფერენციაზე ლავროვმა განაცხადა, რომ რუსეთი საქართველოსთან ომს არ
აპირებს.
მისი თქმით, "სწორედ საქართველო აპირებს აფხაზეთსა და სამხრეთ ოსეთში
ძალოვანი ქმედებების გეგმის განხორციელებას" და ამის დასადასტურებლად
დოკუმენტური მასალების წარმოდგენის პირობა დადო.
თავის მხრივ, ევროკავშირის უმაღლესმა წარმომადგენელმა საგარეო და
უსაფრთხოების საკითხებში ჰავიერ სოლანამ განაცხადა: "რომ სამშვიდობოთა
რაოდენობის გაზრდა შეთანხმებების ფარგლებშიც რომ ხდებოდეს, თუ დაძაბულობის
შემცირება გვსურს, არ მგონია, ასეთ ზომებს ახლა შეიძლება გონივრული
ეწოდოს."
საქართველოს პრეზიდენტის სპეციალურმა წარმომადგენელმა დავით ბაქრაძემ
საქართველოს შესახებ რუსეთის საგარეო საქმეთა მინისტრის განცხადებები
"საბჭოთა დიპლომატიის" გამოვლენად შეაფასა. "სამწუხაროდ, რუსეთმა ასეთი
გზა აირჩია. და მინდა, რუსეთს შევახსენო, როგორ დაასრულა თავისი არსებობა
საბჭოთა კავშირმა," - განაცხადა დავით ბაქრაძემ. მისი თქმით, საქართველო
კონფლიქტის ზონებში რუსი სამხედრო კონტინგენტის გაფართოებას არ დაუშვებს.
"იმ ფონზე, როცა რუსეთის თანამდებობის პირების მხრიდან რეგულარული
განცხადებები გვესმის იმის შესახებ, რომ რუსეთი კონფლიქტში მონაწილეობას
მიიღებს როგორც მხარე, ჩვენ არასდროს და არანაირი ფორმით არ დავეთანხმებით
რუსეთის სამხედრო კვოტის გაზრდას საქართველოში," - განაცხადა ბაქრაძემ.
რუსეთის გადაწყვეტილება გუშინ დავით ბაქრაძემ ჰავიერ სოლანასთან
შეხვედრაზე განიხილა. "რუსეთს არანაირი დიკუმენტი არ აძლევს ლეგიტიმურ
საფუძველს, გაზარდოს სამხედრო კონტინგენტი საქართველოში, მისი თანხობის
გარეშე. ეს ეწინააღმდეგება საერთაშორისო სამართლის ყველა ძირითად ნორმას,
გაერო-ს ქარტიას,” - აღნიშნა შეხვედრის შემდეგ დავით ბაქრაძემ. მისი
თქმით, რუსეთის მიერ საკუთარი ნაბიჯის გამართლება "ძალიან უარყოფითი
საერთაშორისო რეაქციის შემსუბუქების მცდელობაა.”
ბაქრაძემ აღნიშნა, რომ სამშვიდობოთა რიცხოვნობის გასაზრდელად
შესაბამისი პროცედურების გავლა არის საჭირო, კერძოდ, ამისთვის აუცილებელია
საქართველოს თანხმობა, გაერო-ს და "მეგობართა ჯგუფის” ინფორმირება. "ამის
გარეშე ეს არ არის სამშვიდობო ოპერაცია, ეს არის სამხედრო აგრესიის
პროცესის დასაწყისი,” - განაცხადა ბაქრაძემ.
"კონფლიქტის ზონაში მშვიდობისმყოფელთა რაოდენობის ცალმხრივად გაზრდა
არავის წაადგება,” - განაცხადა, თავის მხრივ, ევროკავშირის
სპეცწარმომადგენელმა სამხრეთ კავკასიაში პიტერ სემნებიმ. მისი თქმით,
ევროკავშირში შეისწავლიან ინფორმაციას მომხდარის შესახებ.
გუშინვე საქართველოს საგარეო საქმეთა სამინისტრომ საქართველოსა და
უკრაინის პრეზიდენტების ერთობლივი განცხადება გაავრცელა, რომლის
თანახმადაც, უკრაინა და საქართველო გმობენ რუსეთის უკანასკნელ
განცხადებებს, აფხაზეთში მცხოვრებ თანამემამულეთა დაცვის მიზნით რუსეთის
მხრიდან "სამხედრო ზომების" შესაძლო გამოყენების შესახებ.
საქართველოს პრეზიდენტ მიხეილ სააკაშვილსა და მის უკრაინელ კოლეგა
ვიქტორ იუშჩენკოს შორის გუშინ სატელეფონო საუბარი შედგა. პრეზიდენტებმა
ქართულ-აფხაზური და ქართულ-ოსური კონფლიქტების მოგვარების ირგვლივ
არსებული მდგომარეობა განიხილეს.
სააკაშვილმა და იუშჩენკომ შეშფოთება გამოთქვეს რუსეთის ფედერაციის
მცდელობების გამო, ეჭვქვეშ დააყენოს საქართველოს ტერიტორიული მთლიანობა,
აფხაზეთსა და სამხრეთ ოსეთთან ურთიერთობების სტატუსის ამაღლების გზით.
აღინიშნა, რომ ეს შეიძლება ინტერპრეტირებული იყოს მხოლოდ როგორც ძალის
გამოყენების მუქარა, რაც საქართველოს წინააღმდეგ ღია პროვოკაციას
წარმოადგენს.
უკრაინა მხარს უჭერს საქართველოს პრეზიდენტის ახალ ინიციატივას,
რომელიც ქართულ-აფხაზური კონფლიქტის მშვიდობიანი გზით მოგვარებისკენ არის
მიმართული და იმედოვნებს, რომ აფხაზურ მხარეს კონსტრუქციული რეაქცია
ექნება.
უკრაინა და საქართველო რუსეთის ფედერაციას მოუწოდებენ, უარი თქვას
აფხაზეთისა და სამხრეთ ოსეთის თაობაზე გაცხადებული გეგმების რეალიზაციაზე.
უკრაინა მზადაა, სხვა დაინტერესებულ მხარეებთან ერთად, სამშვიდობო
ოპერაციებში მონაწილეობის საკითხი განიხილოს.
ამ ცნობას სოხუმიდან ოპერატიული რეაგირება მოჰყვა. "კონფლიქტის
მოგვარების პროცესში აფხაზეთში არც ერთი ისეთი ძალის შემოსვლასა და
ჩართვას არ დავთანხმდებით, რომელიც პროქართულ პოლიტიკას გაატარებს. ასეთი
ბრიყვები არ ვართ. ჩვენთვის ასევე დაუშვებელა უკრაინელი სამშვიდობოების
შემოსვლა. სამშვიდობოთა შემადგენლობის საკითხის განხილვაზე საუბარი
ზედმეტია," - განუცხადა სააგენტო "ინტერპრესნიუსს" აფხაზეთის დე ფაქტო
საგარეო საქმეთა მინისტრმა სერგეი შამბამ.
მისი თქმით, სოხუმისთვის არანაირი მნიშვნელობა არა აქვს, თუ რა პოზიციას დაიკავებს უკრაინა კონფლიქტის დარეგულირების საკითხებში.
