- როჯერ, რა უფრო ძნელია - მოიგო როლან გარო, თუ დაამხო პიტ სამპრასის რეკორდი, დიდი სლემის მოგებული ტურნირების რაოდენობის მიხედვით?

- იმედი მაქვს, კარიერის დასრულებამდე ერთსაც შევძლებ და მეორესაც. ჩემი მიზანია მოვიგო საფრანგეთის ღია პირველობა და დავამხო სამპრასის რეკორდი. რეკორდს უკვე მივუახლოვდი. ამ სეზონში მაქვს შანსი კარიერაში პირველად მოვიგო როლან გარო, მეექვსედ - უიმბლდონი და მეხუთედ - აშშ-ს ღია პირველობა. მერწმუნეთ, თუ ერთ-ერთი ამ ტურნირთაგანი მაინც მოვიგე, ეს კარგი მიღწევა იქნება.

- რა გიშლით ხელს გრუნტზე წარმატებით თამაშში?

- შეუძლებელია ერთნაირად ითამაშო ნადალისა და, ვთქვათ, ნალბანდიანის წინააღმდეგ. რაფაელი შეტევის საშუალებას გაძლევს, ნალბანდიანი - არა. გრუნტზე თამაშისას აუცილებელია თითოეულ მეტოქეს მოუძებნო გასაღები. რა თქმა უნდა, ჩემი მთავარი პრობლემა რაფაელ ნადალია, რომლის დამარცხება გრუნტზე ახლა თითქმის წარმოუდგენლად ჩანს. თუმცა მე ვიცი, რომ შემიძლია მის წინააღმდეგ თამაში. თუ ერთი წლის წინ მასთან თამაშისას დისკომფორტს ვგრძნობდი, ახლა ვითარება შეიცვალა.

- რა არის საფრანგეთის ღია პირველობაში კარგი და ცუდი?

- იყო დრო, როდესაც ეს ტურნირი არ მიყვარდა, რადგან რამდენჯერმე ძალიან ადრე გამოვეთიშე. თავიდან პარიზულ კორტებზე დისკომფორტს ვგრძნობდი. წლეულს როლან გაროს დაწყებამდე ერთი კვირით ადრე ჩამოვედი პარიზში და ცენტრალურ კორტზე ყოველდღიურად სამ საათს ვვარჯიშობდი. ახლა საფრანგეთის ღია პირველობა ჩემთვის ზუსტად ისეთივე ტურნირია, როგორიც ნებისმიერი სხვა.

- თქვენს მწვრთნელად ახლა ხოსე იგეირასა მუშაობს. ძნელი იყო მწვრთნელის შერჩევა?

- ვფიქრობ, ის შეძლებს დამეხმაროს. მე მჭირდება ისეთი მწვრთნელი, რომელთან ერთადაც შევძლებ ვარჯიშს, შემდეგ კი თუნდაც ერთად ვივახშმებთ და ოდნავ განტვირთვას მოვიწყობ. ხოსე სწორედ ასეთი ადამიანია.

- რომელმა მწვრთნელმა მოახდინა თქვენს თამაშზე ყველაზე დიდი გავლენა?

- ტექნიკის თვალსაზრისით - პიტერ კარტერმა. შემდეგ - პიტერ ლუნდგრენმა, რომელმაც პროფესიონალად მაქცია. ტონი როჩი კი დამეხმარა, რომ უფრო შემტევი ჩოგბურთის თამაში დამეწყო.

- რას ფიქრობთ, როდესაც ჩოგბურთელს მისი ოჯახის წევრი ავარჯიშებს? მაგალითად, ნადალის მწვრთნელი მისი ბიძაა...

- სულ სხვადასხვაა, როცა მწვრთნელის როლს მამა ასრულებს. ქალთა ჩოგბურთში ასეთი რამ მიღებულია. ჩემი შვილი რომ ჩოგბურთელი იყოს, მის ვარჯიშს ხელს არ მოვკიდებდი. ნადალი და ბიძამისი კი მგონი მშვენივრად ეწყობიან ერთმანეთს. რაფაელისთვის ეს ოპტიმალურ ვარიანტად მიმაჩნია.

- წლის დასაწყისში ამბობდნენ, ფედერერმა საკუთარი თავი ამოწურაო. ღიზიანდებოდით?

- სასაცილოა. ავსტრალიის ღია პირველობამდე ორი თვით ადრე შანხაის ტურნირი მოვიგე და მაშინ თქვეს, რომ ყველა დროის საუკეთესო ჩოგბურთელი ვარ. ავსტრალიაში მარცხის შემდეგ კი რატომღაც ჩამომწერეს.

- თუ ნადალმა პირველობა ჩამოგართვათ, თქვენს შორის ისევ ნორმალური ურთიერთობა იქნება?

- რა თქმა უნდა. ნადალში ყოველთვის ვხედავდი ჩოგბურთელს, რომელიც პირველობას იმსახურებს. გარდა ამისა, ვინც არ უნდა იყოს ის ჩოგბურთელი, რომელიც პირველობას ჩამომართმევს, მისდამი ყოველთვის პატივისცემით ვიქნები გამსჭვალული.

- თქვენი ადრინდელი ინტერვიუებიდან ჩანს, რომ ნადალი და გასკე უფრო მოგწონთ, ვიდრე ჯოკოვიჩი. რატომ?

- მომწონს რაფაელის ჩოგბურთი, რადგან მიმაჩნია, რომ ნადალი უნიკალურია. გასკეს ბრწყინვალე დარტყმა აქვს მარცხენათი. ვნატრობ, რომ მეც ასეთი დარტყმა მქონდეს. რაც შეეხება ჯოკოვიჩს, არასდროს არ მითქვამს, რომ მისი თამაში არ მომწონს. მაგრამ გემოვნებაზე ხომ არ დავობენ. მე ნადალს ვანიჭებ უპირატესობას.