მოლაპარაკებების ხანგრძლივი ეტაპი, რომელმაც სათავე 2006 წელს აიღო, სხვადასხვა მიზეზით რამდენჯერმა გადაიდო, თუმცა ამჯერად ევროგაერთიანების 27-ეულმა აღნიშნულ საკითხზე კონსენსუსის მიღწევა შეძლო. სლოვენიის საგარეო საქმეთა მინისტრმა დიმიტრი რუპელმა, როგორც ევროკავშირის დროებითი პრეზიდენტი სახელმწიფოს წარმომადგენელმა, მიღწეულ შეთანხმებას მძიმე და ამავე დროს შედეგიანი უწოდა.

ბოლო კვირების მანძილზე ლიტვის ხელისუფლებასთან მიმდინარე ინტენსიურმა მოლაპარაკებებმა საბოლოოდ შედეგი გამოიღო და ოფიციალურმა ვილნიუსმა, საერთო ევროპული ინტერესების გათვალისწინებით, დოკუმენტის მიღებაზე თანხმობა განაცხადა. აღსანიშნავია, რომ ლიტვის ხელისუფლებას რუსულ მხარესთან პრეტენზიები, ძირითადად, ენერგოუსაფრთხოებისა და საქართველოსა და მოლდოვაში არსებული გაყინული კონფლიქტების საკითხებზე ჰქონდა, რაც რეალურად მხედველობაში იქნა მიღებული. აღნიშნულ საკითხებზე მუშაობა ხელშეკრულების გაფორმების შემდეგ დაიწყება.

"გაყინული კონფლიქტების თემა ყველა ჩვენგანისთვის უაღრესად მნიშვნელოვანია და ჩვენ აღნიშნულ საკითხს უშუალოდ რუსულ მხარესთან გასამართი მოლაპარაკებების განმავლობაში აუცილებლად დავუბრუნდებით," - განაცხადა სლოვენიის საგარეო საქმეთა მინისტრმა. აქვე უნდა აღინიშნოს, რომ ოფიციალურმა ბრიუსელმა ლიტვურ მხარეს მოთხოვნების ცალმხრივად ჩამოყალიბების წინადადებით მიმართა, გამომდინარე იქიდან, რომ ოფიციალური ვილნიუსის მიერ წამოჭრილი თითოეული საკითხის ხელშეკრულების ფორმატში გათვალისწინება ფორმალურად ვერ მოხერხდება.

აღსანიშნავია, რომ "პარტნიორობისა და თანამშრომლობის პაქტზე" კონკრეტული მოლაპარაკებები სტარტს ივნისის პირველ ნახევარში, ციმბირში გამართულ რუსეთ-ევროკავშირის მორიგ სამიტზე აიღებს. თუმცა, უშუალოდ შეთანხმების რატიფიცირებას დამატებით კიდევ ერთი წელი დასჭირდება, რამეთუ დოკუმენტი რუსეთის და ევროგაერთიანების 27-ივე წევრი სახელმწიფოს მიერ უნდა იქნეს რატიფიცირებული. "ამ ეტაპზე მოლაპარაკებების დაჩქარება აუცილებლობას არ წარმოადგენს. მთავარი უშუალოდ პროცესის დასაწყისია და მოლაპარაკებების მიმდინარეობისას ჩვენ ყველა იმ პრობლემურ საკითხზე ვეცდებით შეთანხმების მიღწევას, რომლებიც დღეისათვის რუსეთის ფედერაციასთან მიმართებით არსებობს," - განაცხადა ევროკავშირის ამჟამინდელი პრეზიდენტი ქვეყნის საგარეო საქმეთა მინისტრმა დიმიტრი რუპელმა.

რუსეთის ფედერაციასთან გასაფორმებელი თანამშრომლობის პაქტზე კომენტარი გააკეთა ჰავიერ სოლანამაც, რომელმაც ყურადღება, ძირითადად, რუსეთთან თანამშრომლობის მნიშვნელობაზე გაამახვილა. "როცა ასეთი მნიშვნელოვანი მეზობელი გყავს და მით უმეტეს თუ მასთან მჭიდრო პოლიტიკურ-ეკონომიკური ურთიერთობები გაკავშირებს, ფუნდამენტური და სტაბილური ურთიერთობის დამყარება უაღრესად მნიშვნელოვანია," - განაცხადა ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში ჰავიერ სოლანამ.

აღსანიშნავია, რომ დოკუმენტი, რომელიც მხარეების მჭიდრო პოლიტიკურ და ეკონომიკურ თანამშრომლობას ითვალისწინებს, მოსკოვსა და ბრიუსელს შორის არსებულ ურთიერთობებს ახალ ეტაპზე გადაიყვანს. ნიშანდობლივია ის ფაქტიც, რომ "პარტნიორობისა და თანამშრომლობის პაქტი" მხარეებს შორის პირველად ჯერ კიდევ 1997 წელს გაფორმდა, თუმცა ხელშეკრულებაზე გათვალისწინებული 10-წლიანი პერიოდი გასულ წელს ამოიწურა. ამჟამად მიმდინარე მოლაპარაკებები სწორედ თანამშრომლობის ახალ ეტაპზე გადასვლას ითვალისწინებს.