რესპონდენტთა 49,30 პროცენტი ვარაუდობს, რომ ქვეყანაში მოვლენები ფართომასშტაბიანი მშვიდობიანი აქციების ფონზე წარიმართება, თუმცა მათივე მოსაზრებით, აქციები ვერაფერს ვერ შეცვლის და ახალი პარლამენტი, თუნდაც ოპოზიციის გარეშე, მუშაობას შეუდგება. 28,03 პროცენტის აზრით, ხალხი ოპოზიციის მოწოდებას არ აჰყვება და შესაბამისად - არაფერი შეიცვლება, გამოკითხულთა მხოლოდ 12,13 პროცენტი აცხადებს, რომ დესტრუქციული, უკონტროლო პროცესები განვითარდება და სიტუაცია გამწვავდება. 10,54 პროცენტის მოსაზრებით, ფართომასშტაბიანი მიტინგები არჩევნების შედეგების გაუქმებითა და ახალი არჩევნების დანიშვნით დასრულდება.

გამოკითხვის შედეგად გაირკვა, რომ რესპონდენტთა 46 პროცენტი არჩევნების შედეგებს არ ენდობა. გამოკითხულთა 41,15 პროცენტი აცხადებს, რომ არჩევნების შედეგად, ფაქტობრივად, ერთპარტიული პარლამენტი ჩამოყალიბდა, 24,25 პროცენტი მიიჩნევს, რომ პარლამენტი მრავალპარტიული და დემოკრატიულია, 30,02 პროცენტის აზრით კი, ახალი პარლამენტი წინამორბედისგან არაფრით განსხვავდება.

მიმდინარე პოლიტიკური პროცესების თაობაზე კონფლიქტებისა და მოლაპარაკებების საერთაშორისო კვლევითმა ცენტრმა სატელეფონო გამოკითხვა დედაქალაქის მასშტაბით ჩაატარა. შემთხვევითი შერჩევის პრინციპით სულ 503 რესპონდენტი გამოიკითხა.